ပညာရှင်နှင့် အရပ်ဘက်အဖွဲ့များ နိုင်ငံရေးဆွေးနွေးပွဲများတွင် လက်မခံဟု တိုင်းရင်းသား လက်နက်ကိုင်များ ပြောကြား

အစိုးရနှင့် တိုင်းရင်းသား လက်နက်ကိုင် အဖွဲ့များအကြား တစ်နိုင်ငံလုံး အပစ်အခတ်ရပ်စဲရေး စာချုပ်ချုပ်ဆိုပြီးနောက် ဆက်လက်ပြုလုပ်မည့် ပြည်ထောင်စုညီလာခံ (ခေါ်) နိုင်ငံရေး ဆွေးနွေးပွဲများတွင် ပညာရှင်နှင့် အရပ်ဘက် အဖွဲ့အစည်းများ ပါဝင်မှုကို လက်မခံနိုင်ကြောင်း တစ်နိုင်ငံလုံး အပစ်အခတ်ရပ်စဲရေးဆိုင်ရာ ညှိနှိုင်းအဖွဲ့ NCCT ခေါင်းဆောင် ဦးနိုင်ဟံသာက ပြောဆိုလိုက်သည်။

ကချင်လွတ်လပ်ရေးအဖွဲ့ (KIO) ဌာနချုပ် လိုင်ဇာတွင် ဇူလိုင်လ ၂၉ ရက်နေ့က ပြုလုပ်သည့် NCCT ထိပ်သီး အစည်းအဝေးဆိုင်ရာ သတင်းစာရှင်းလင်းပွဲ၌ ၎င်းက အထက်ပါအတိုင်း ပြောဆိုခြင်း ဖြစ်သည်။
နိုင်ငံရေး ဆွေးနွေးပွဲများတွင် အစိုးရအဖွဲ့၊ တိုင်းရင်းသား လက်နက်ကိုင် အင်အားစုများနှင့် ပြည်တွင်း၌ တရားဝင် ရပ်တည်နေသော နိုင်ငံရေးပါတီများ ဟူ၍ အစုအဖွဲ့ သုံးခုမှ ကိုယ်စားလှယ် အရေအတွက် အချိုးစားတူ ပါဝင်၍ နိုင်ငံရေး ပြဿနာများကို အဖြေရှာရန် တောင်းဆိုကြောင်း ဦးနိုင်ဟံသာက ပြောဆိုသည်။
အစိုးရကမူ အဆိုပါ နိုင်ငံရေး ဆွေးနွေးပွဲများမှာ အားလုံးပါဝင်သော (All Inclusive) ဆွေးနွေးပွဲများ ဖြစ်ရန် လိုအပ်ပြီး အစိုးရ၊ လွှတ်တော်၊ တပ်မတော်၊ နိုင်ငံရေးပါတီများ၊ တိုင်းရင်းသား လက်နက်ကိုင်အဖွဲ့များ၊ စီးပွားရေး အင်အားစု၊ ပညာရှင်များနှင့် လူမှုအဖွဲ့အစည်းများ ဟူ၍ ကဏ္ဍစုံ ပါဝင်ရန် အဆိုပြု သတ်မှတ်ထားခြင်း ဖြစ်သည်။
ယင်းသို့ အစိုးရ၏ အဆိုပြုချက်နှင့် ပတ်သက်၍ “တန်းတူမရှိဘူး၊ တရားမျှတမှု မရှိဘူး။ လက်မခံနိုင်ဘူး” ဟူ၍ NCCT အဖွဲ့ ခေါင်းဆောင် ဦးနိုင်ဟံသာက ကန့်ကွက်သည်။
တိုင်းရင်းသား လက်နက်ကိုင်များက သုံးပွင့်ဆိုင်သာ ဆွေးနွေးနိုင်မည် ဖြစ်ကြောင်း၊ အစိုးရ အဆိုပြုသည့် ၈ ပွင့်ဆိုင်ကို လက်ခံမည် မဟုတ်ကြောင်း NCCT အဖွဲ့က ငြင်းဆိုနေခြင်း ဖြစ်သည်။
သို့သော် ၈၈ မျိုးဆက် ငြိမ်းချမ်းရေးနှင့် ပွင့်လင်းလူ့အဖွဲ့အစည်း အပါအဝင် လူထုအခြေပြု အရပ်ဘက် အဖွဲ့အစည်း ၇၀ ကျော်မှာ ငြိမ်းချမ်းရေးဖြစ်စဉ်နှင့် နိုင်ငံရေး ဆွေးနွေးပွဲများတွင် ပါဝင်ရေးအတွက် ငြိမ်းချမ်းရေးအတွက် အရပ်ဘက် အဖွဲ့အစည်း ဖိုရမ်များ ၇ ကြိမ်ထက်မနည်း ပြုလုပ်ပြင်ဆင်ထားပြီး ဖြစ်သည်။
ယင်းသို့ အရပ်ဘက် အဖွဲ့အစည်းများကို လက်မခံခြင်းမှာ နိုင်ငံရေးနှင့် ပတ်သက်ခြင်း မရှိကြောင်း၊ ယင်းအတွက် နိုင်ငံရေး ဆွေးနွေးပွဲများတွင် အဆိုပါအဖွဲ့များ ပါဝင်ရန် မလိုအပ်ကြောင်း အခြား NCCT ခေါင်းဆောင်တစ်ဦး ဖြစ်သူ ပဒိုကွယ်ထူးဝင်းက ရှင်းပြသည်။
သို့သော် တစ်နိုင်ငံလုံး အပစ်အခတ်ရပ်စဲရေးနှင့် အပစ်အခတ် ရပ်စဲရေးပြီးနောက် ပြုလုပ်မည့် ပြည်ထောင်စု ညီလာခံအတွက် အစိုးရနှင့် တိုင်းရင်းသား အဖွဲ့များအကြား အကျေအလည် ညှိနှိုင်းစရာများ ကျန်ရှိနေပြီး အဆိုပါ ၃ ပွင့်ဆိုင်၊ ၈ ပွင့်ဆိုင် ပြဿနာမှာလည်း အဓိက ညှိနှိုင်းရခက်ခဲသည့် ကိစ္စရပ်တစ်ခု ဖြစ်နေကြောင်း ငြိမ်းချမ်းရေး အကျိုးဆောင်များက မှတ်ချက်ပြုသည်။